काँकरभिट्टा, झापा । मानव बेचबिखन तथा ओसारपसार नियन्त्रण, लैङ्गिक हिंसा न्यूनीकरण तथा समाजमा सकारात्मक परिवर्तन ल्याउने उद्देश्यले आफन्त नेपालले झापाको काँकरभिट्टामा ‘म एक जिम्मेवार पुरुष हुँ’ अभियानअन्तर्गत जिम्मेवार पुरुष समूह गठन गरेको छ। विभिन्न जिल्लामा गरी संस्थाले गठन गरेको यो १६ `म एक जिम्मेवार पुरुष समूह ´हो।
आफन्त नेपालका जिल्ला प्रमुख मात्रिका गुरुङको अध्यक्षतामा सम्पन्न भेलामा संस्थाको केन्द्रबाट केशर विश्वकर्माको उपस्थिति रहेको थियो। भेलाले स्थानीय स्तरमा राजु खड्काको अध्यक्षतामा जिम्मेवार पुरुष समूह गठन गरेको हो।
समूहमा स्थानीयस्तरबाट मनोज गुरुङ, अमन विश्वकर्मा, शिवकुमार पाठक, होमराज राई र खड्गराज कार्कीलगायत विभिन्न क्षेत्रका व्यक्तिहरू सहभागी छन्। समूहमा आबद्ध सदस्यहरूले मानव बेचबिखन, लैङ्गिक हिंसा तथा महिला र बालबालिकामाथि हुने विभिन्न किसिमका हिंसा तथा शोषणविरुद्ध समुदायमा सचेतना अभिवृद्धि गर्दै जिम्मेवार भूमिका निर्वाह गर्ने प्रतिबद्धता जनाएका छन्।
आफन्त नेपालले मानव बेचबिखन तथा ओसारपसार नियन्त्रणको अभियानलाई समुदायस्तरमा थप प्रभावकारी बनाउन पुरुषको सक्रिय सहभागितालाई प्राथमिकता दिँदै आएको छ। ‘म एक जिम्मेवार पुरुष हुँ’ अभियानमार्फत पुरुषलाई आफ्नो परिवारप्रतिको जिम्मेवारीमा मात्र सीमित नरही समाजमा हुने हिंसा, विभेद, अन्याय, मानव बेचबिखन तथा शोषणविरुद्ध सक्रिय हुन प्रेरित गरिएको छ।
कार्यक्रममा जिम्मेवार पुरुषले समाजमा सकारात्मक परिवर्तन ल्याउन खेल्न सक्ने भूमिकाका विषयमा छलफल गरिएको थियो। समाजमा हुने हिंसा र विभेदलाई महिलाको मात्र समस्या नठानी पुरुषले समेत त्यसको रोकथाम र न्यूनीकरणमा आफ्नो जिम्मेवारी महसुस गर्नुपर्नेमा जोड दिइएको थियो।
गठित समूहले आफ्ना गतिविधिलाई निरन्तरता दिन हरेक तीन महिनामा भेटघाट तथा छलफल गर्ने निर्णय गरेको छ। त्यस्तै सदस्यहरूबीच नियमित समन्वय कायम गर्न ह्वाट्सएप समूहमा निरन्तर सम्पर्कमा रहने र मानव बेचबिखन, लैङ्गिक हिंसा तथा समुदायसँग सम्बन्धित ताजा सूचना तथा अपडेटहरू आदानप्रदान गरिरहने निर्णयसमेत गरिएको छ।
आफन्त नेपालले विभिन्न जिल्लामा १६ समूह गठन गरेका यस्ता जिम्मेवार पुरुष समूहलाई मानव बेचबिखन तथा लैङ्गिक हिंसाविरुद्ध समुदायस्तरमा सचेतना फैलाउने, जोखिम पहिचानमा सहयोग गर्ने र आवश्यक समन्वय तथा खबर आदानप्रदान गर्ने अभियानमा जोड्दै आएको छ।
संस्थाले काँकरभिट्टामा यस समूह गठन गरेसँगै ‘म एक जिम्मेवार पुरुष हुँ’ अभियानलाई थप विस्तार गर्दै मानव बेचबिखन तथा ओसारपसार नियन्त्रण र हिंसामुक्त समाज निर्माणमा पुरुषको अर्थपूर्ण सहभागिता बढाउने लक्ष्य राखेको छ।
