२१ मंसिर ,
मेचीनगर । जनतालाई परेको समस्यालाई छिटो र सहज ढंगले सुरक्षा दिन खटिएका नगर प्रहरीलाई नगरपालिकाले आज गाडी उपलब्ध गराएको छ ।
विहीबार विहान मेचीनगर नगरपालिका कार्यालयको परिसरमा एक कार्यक्रमको आयोजना गरेर नगर प्रहरीलाई गाडी जिम्मा दिईएको हो ।
मेयर गोपालचन्द्र बुढाथोकी, उपमेयर मीना पोखरेल उप्रेती, प्रमुख प्रशासकीय अधिकृत अग्निप्रसाद अधिकारी, वरिष्ठ प्रशासकीय अधिकृत अनन्तप्रकाश वस्ती लगायतले नगर प्रहरीलाई गाडीको चावी बुझाईएको हो ।
जिम्मेवारीलाई समयमै कार्यन्वयन गर्न, काममा सहजता होस र जनताका समस्यालाई सहज ढंगले कार्यान्वयन गर्न भनेर नगर प्रहरीलाई सवारी साधन दिएको मेयर बुढाथोकी बताए ।
उपमेयर उप्रेतीले न्यायिक समितिले गरेका निर्णय तथा बजारमा हुने कालोबजारी, खाद्य वस्तुको कृत्रिम अभाव तथा वजार अनुगमनमा समेत नगर प्रहरीको महत्वपूर्ण भूमिका हुने बताइन् ।
यस्तै प्रमुख प्रशासकीय अधिकृत अधिकारी, प्रशासन, योजना तथा अनुगमन शाखा प्रमुख वस्तीले नगर प्रहरीको काम, कर्तव्य र अधिकारलाई बुझेर नगरवासीबीच पुग्न र नगर प्रहरी नगरवासीकै हुन् भन्ने सन्देश दिने गरी लाग्न सुझाव दिएका छन् ।
नगरपालिकामा एक चालकसहित १९ जना नगरप्रहरी रहेका छन् । कार्यालयले नगरप्रहरीलाई आफ्नो छुट्टै सवारी साधन उपलब्ध गराएसँगै अब जिम्मेवारी समयमै कार्यन्वयन गर्न थप सहज भएको नगर प्रहरी प्रमुख प्रहरी सहायक निरीक्षक श्याम गिरीको भनाई छ ।
