२३ भाद्र,
झापा । एक हप्ताअघि दमकमा गाई काटेर मारेको आरोपमा प्रहरीले एक महिलासहित चार जनालाई पक्राउ गरी आज सार्वजनिक गरेको छ । जिल्ला प्रहरी कार्यालय झापाले उक्त घटनाको अनुसन्धान गर्ने क्रममा प्रहरीले चार जनालाई शुक्रबार पक्राउ गरेर आइतबार सार्वजनिक गरेको हो ।
पक्राउ पर्नेमा दमक–२ बेलडाँगी स्थित भुटानी शरणार्थी शिविर क्याम्प नम्बर २ छाप्रो नम्बर ३३२ मा बस्ने वर्ष ४४ को प्रेमबहादुर विष्ट, दमक–३ बेलडाँगी स्थित भुटानी शरणार्थी शिविर क्याम्प क्याम्प नं. ३ छाप्रो नम्बर ए३–२०८ बस्ने बस्ने वर्ष ३८ का खगेन्द्र दुलाल, दमक–३ बेलडाँगी स्थित भुटानी शरणार्थी शिविर क्याम्प क्याम्प नं. ३ छाप्रो नम्बर ए२–१२० बस्ने वर्ष ३२ का विधान थापा र दमक–४ बस्ने वर्ष ४५ की गीता श्रेष्ठ रहेका छन् । श्रेष्ठ बाहेक अन्य तीनै जना युवाहरू भुटानी शरणार्थी हुन् ।
जिल्ला प्रहरी कार्यालय झापाका अनुसार पक्राउ परेका विष्ट यसअघि पनि विभिन्न मितिमा चोरी, डाँका र केही सार्वजनिक अपराधमा दमक प्रहरीले मुद्दा दर्ता गरी कारबाही गरेको थियो ।
त्यस्तै दुलाल यसअघि जबरजस्ती करणी मुद्दामा जिल्ला प्रहरी र पशुपंक्षी सम्बन्धी कसुर मुद्दामा दमक प्रहरीले मुद्दा दर्ता गरी कारबाही गरेको थियो । यस्तै थापा यसअघि विभिन्न मितिमा इलाका प्रहरी कार्यालय दमकबाट केही सार्वजनिक अपराधमा मुद्दा दर्ता भई कारबाही भएको प्रहरीको भनाई छ ।
घटनामा प्रयोग भएको खुकुरी, बन्चरो र मासु बोक्न प्रयोग गरेको झोला उनीहरूको कोठाबाट बरामद भएको प्रहरीले बताएको छ । पक्राउ परेका व्यक्तिहरूलाई पशुपंक्षी सम्बन्धी कसुरमा अनुसन्धान गरी मुद्दा दर्ता गरिने बताइएको छ ।
यही भदौ १८ गते राति दमक नगरपालिका–२ बस्ने लछुमन विष्टको वडा नम्बर १ स्थित पानीट्याङकी गोठमा बाँधी राखेको दुई महिनाको गर्भेणी समेत रहेको गाई चोरी गरी करिव एकसय मिटर टाढा खाली प्लटिङको जग्गामा लगेर मारेको अवस्थामा फेला परेको थियो ।
गोठमा बाँधेको गाईलाई खाली प्लटिङ जग्गामा लगेर टाउकोमा बन्चरो प्रहार गरी मारेर खुट्टा, करङ र घाँटीको मासु काटेर लगेका थिए । शरीरका अन्य भाग मात्र खाली प्लटिङ जग्गामा छाडेर हिडेको आरोप प्रहरीको छ ।
जिल्ला प्रहरी कार्यालय झापाका प्रमुख एसपी मिलन केसीले पक्राउ परेका विष्ट लगायतका व्यक्तिहरु यसअघि अपराधिक गतिविधिमा सामेल भएको बताए । उनीहरुको कुनै धार्मिक र जातिय हिंसा फैलाउन नभई गाई मारेर मासु बिक्री गर्ने योजना रहेको एसपी केसीको भनाई छ ।
