झापा, मेचीनगर । नेपाल ख्रीष्टियन रिभाइभल चर्च काउन्सिल (एनसीआरसी) का पूर्व अध्यक्ष रेभ. पास्टर एबी क्षेत्रीको ६८ वर्षको उमेरमा निधन भएको छ। उहाँको फागुन २६ गते बेलुका करिब १० बजे मेचीनगर–१२ स्थित आफ्नै निवासमा निधन भएको पारिवारिक स्रोतले जनाएको छ।
उहाँको पार्थिव शरीरमा आज निवासमै श्रद्धाञ्जली कार्यक्रम आयोजना गरी झापाको धुलाबारीस्थित आफ्नै मिसनको जग्गामा दफन गरिएको छ।
अन्त्येष्टि कार्यक्रममा एनसीआरसीका अध्यक्ष, सचिव, हिमालय मिसनका पास्टर ख्रेसा खोले, काउन्सिलका रेभ. पास्टर एनोस गजमेर, रेभ. लेवी रियू, केभी क्षेत्री, डिकन डेबिड लिम्बूलगायत एनसीआरसी अन्तर्गतका विभिन्न मण्डलीका पास्टर, अगुवा तथा मण्डली परिवारको उल्लेख्य उपस्थिति रहेको थियो। साथै झापामा रहेका विभिन्न समाजका अध्यक्ष तथा प्रतिनिधिहरूको पनि कार्यक्रममा सहभागिता रहेको जनाइएको छ।
रेभ. क्षेत्रीको निधनसँगै नेपाल ख्रीष्टियन रिभाइभल चर्च काउन्सिलले एक समर्पित तथा विश्वासयोग्य अगुवालाई गुमाएको मण्डलीका अगुवाहरूले बताएका छन्। उहाँ मण्डलीको उन्नति, प्रगति तथा आत्मिक विकासका लागि जीवनभर समर्पित रहँदै सेवाकार्यमा सक्रिय रहनुभएको थियो।
उहाँले नेपाल मात्र नभई भारतको नागाल्याण्ड र आसाम लगायतका क्षेत्रमा रहेका नेपाली समुदायबीच सुसमाचार प्रचार तथा मण्डली विस्तारमा महत्वपूर्ण भूमिका निर्वाह गर्नुभएको थियो। उहाँ नागाल्याण्डको पिफिमामा प्रेसिडेन्टका संस्थापक पास्टरसमेत हुनुहुन्थ्यो।
यसैगरी अरुणाचल, भुटान र सिक्किम जस्ता क्षेत्रमा पुगेर पनि उहाँले रिभाइभल सेवाकार्य विस्तार गर्नुभएको बताइन्छ। नेपालको पूर्व मेचीदेखि पश्चिम महाकालीसम्म सुसमाचार फैलाउने अभियानमा उहाँ सक्रिय रहनुभएको थियो।
सेवाकै क्रममा ख्रीष्टियन विरोधी समूहबाट उहाँमाथि कुटपिटसमेत भएको उल्लेख गरिएको छ। वि.सं. २०४९ सालदेखि उहाँ झापाको मेचीनगर–१२ मा स्थायी रूपमा बसोबास गर्दै मण्डली तथा मिशन सेवामा निरन्तर सक्रिय रहनुभएको थियो।
रेभ. पास्टर एबी क्षेत्रीको निधनप्रति मण्डलीका अगुवा, विश्वासी तथा विभिन्न क्षेत्रका व्यक्तिहरूले दुःख व्यक्त गर्दै उहाँको योगदानको स्मरण गरेका छन्।
