९ पुस ,
झापा । धर्म परिवर्तन गराएको आरोपमा पक्राउ परेका लम्की सामुदायिक चर्चका पाष्टर जन्मजय भट्टराईलाई बिना सर्त रिहा गर्न आमूल परिवर्तन नागरिक पार्टीले माग गरेको छ ।
इसाई धर्मावलम्बीहरूको महत्त्वपूर्ण पर्व ख्रिष्टमसको खुशीयालीमा कैलालीको लम्की चुहा नगरपालिका–१ मा रहेको शहीद स्मृति माविमा असाह्य बालबालिकालाई किताब बोक्ने झोला र स्टेशनरी बितरण गर्ने क्रममा धर्म परिवर्तन गराएको आरोपमा पक्राउ परेका उनलाई बिना सर्त रिहा गर्न आमूल परिवर्तन नागरिक पार्टी (एपीएन)ले माग गरेको हो ।
भट्टराई पक्राउ परेको खबर पाउनासाथ सो पार्टीले प्रेस विज्ञप्ति जारी गरेका छ । अध्यक्ष दलमर्दन कामीद्वारा हस्ताक्षरित विज्ञप्तिमा भनिएको छ : नेपालको संविधानको धारा २६ (१) मा उल्लेखित धर्ममा आस्था राख्ने प्रत्येक व्यक्तिलाई आफ्नो आस्था अनुसार धर्मको अवलम्बन, अभ्यास र संरक्षण गर्ने स्वतन्त्रता हुनेछ भन्ने लिखित वाक्यांश, त्यसको मर्म, भावना, मूल्य र मन्यतालाई नै चुनौती दिँदै पक्राउ गरिनु संविधानमाथिकै आक्रमण भएको एपीएनको भनाई छ ।
विज्ञप्तिमा भनिएको छ, “धर्मनिरपेक्ष राष्ट्रमा राज्यको धर्म हुँदैन तर सत्ता र शक्तिको दुरुपयोग गरी हिन्दु बाहेकका अन्य धर्मलाई स्वीकार नगर्ने विभेदकारी रणनीतिका साथ एकल धार्मिक राज्यका रूपमा अघि बढ्नु खेद पूर्ण रहेको छ ।
यसबाट धार्मिक अल्पसङ्ख्यक समूहलाई विभेद गरेको अनुभूति भएको छ । राज्यबाटै यस्तो हर्कत गरिनु संवैधानिक अधिकारको हनन र घोर अन्याय हो ।”
इसाई धर्मावलम्बीले हर्षाेल्लासका साथ मनाइने ख्रिष्टमसको अघिल्लो दिन विद्यार्थीहरूलाई पढ्नमा अझै उत्साहित हुन् भन्ने पवित्र उद्देश्य राखेर सहयोग गर्नु अति उदाहरणीय कार्य भएको एपीएनको तर्क छ ।
राज्यले सहयोग गर्न पर्ने ठाउँमा व्यक्तिले सहयोग गर्दा उल्टै केही हिन्दु अतिवादीहरूकोउक्साहटमा धर्मपरिवर्तनको झुट्टा मुद्दा लगाई पक्राउ गर्नु राम्रो नभएको र संविधानकै बर्खिलाप भएको भन्दै भट्टराईलाई तत्काल विना सर्त रिहा गर्न माग गरेको छ ।
