काँकरभिट्टा। बालबालिकामाथि हुने यौनजन्य हिंसाको रोकथाम, बाल संरक्षण तथा सरोकारवाला निकायबीचको समन्वय सुदृढ गर्ने उद्देश्यले “बालबालिकामाथि हुने यौनजन्य हिंसाविरुद्ध सरोकारवालासँग अन्तरक्रिया तथा छलफल कार्यक्रम” शुक्रबार काँकरभिट्टा बहुमुखी क्याम्पसको सभाकक्षमा सम्पन्न भएको छ।
अन्तरक्रिया कार्यक्रममा मेचीनगर नगरपालिकाले बालबालिकासम्बन्धी ऐन, नीति तथा कार्यविधि शीघ्र जारी गर्नुपर्ने विषयमा सहभागीहरूले विशेष जोड दिएका थिए। बाल संरक्षणजस्तो संवेदनशील विषयमा स्थानीय सरकार अभिभावकीय भूमिकामा रहेर प्रभावकारी नेतृत्व, आवश्यक सहयोग तथा सरोकारवाला निकायहरूसँग समन्वय र सहकार्यलाई थप सुदृढ बनाउनुपर्ने धारणा वक्ताहरूले व्यक्त गरेका थिए।
कार्यक्रममा सिडिएफका अध्यक्ष सोमराज ढकाल, अनुसन्धानकर्ता गोविन्द न्यौपाने, एमजेकेकी अध्यक्ष सीता गुरुङ, भुवन सुब्बा, नव अभियान नेपालका डिल्लीराम थापा मगर, साहसी महिला नेपालका होमराज राई, साना हातहरू नेपालका दीपक पौडेली, सिडीएफका दीपक ढकाल, पत्रकारहरू सन्तोष आचार्य, विमर्श उप्रेती, मुकुन्द शिवाकोटी, विनोद राजवंशी लगायतले बाल संरक्षण, बाल अधिकार तथा यौनजन्य हिंसा रोकथामका विषयमा आफ्ना धारणा व्यक्त गरेका थिए।
बाल जागरण मञ्च नेपालको आयोजनामा सम्पन्न कार्यक्रम संस्थाका अध्यक्ष मणिकुमार लिम्बूको अध्यक्षतामा सम्पन्न भएको थियो। कार्यक्रमको सञ्चालन संस्थाका सचिव मदन अधिकारीले गरेका थिए भने कार्यक्रम संयोजक खुशी लोहारले कार्यक्रमको उद्देश्य तथा औचित्यमाथि प्रकाश पारेकी थिइन्।
