विराटनगर । सुनसरी प्रहरीले एक अर्ब ५७ करोड रुपैयाँभन्दा बढीको शंकास्पद हुण्डी कारोबारको अनुसन्धान अघि बढाउँदै विराटनगरका दुई जनालाई पक्राउ गरेको छ ।
बैंकिङ कारोबारको विश्लेषणका क्रममा ठूलो रकम हुण्डीमार्फत कारोबार भएको देखिएपछि उनीहरुलाई पक्राउ गरी अनुसन्धान थालिएको सुनसरी प्रहरीका सूचना अधिकारी डीएसपी चन्द्रबहादुर खड्काले बताए । उनका अनुसार केही व्यक्तिले हुण्डी कारोबार गर्दै आएको विशेष सूचनाका आधारमा शंकास्पद व्यक्तिहरुको बैंकिङ कारोबारमाथि निगरानी र विश्लेषण सुरु गरिएको थियो ।
त्यसक्रममा व्यक्तिगत तथा विभिन्न फर्मका नाममा रहेका बैंक खातामार्फत अन्य व्यक्तिसँगको मिलेमतोमा ठूलो परिमाणमा रकम कारोबार भएको देखिएको दाबी प्रहरीको छ । प्रहरीले हालसम्मको अनुसन्धानबाट एक अर्ब ५७ करोड ६४ लाख ३९ हजार तीन सय ४० रुपैयाँ ८१ पैसा बराबरको रकम हुण्डीको माध्यमबाट कारोबार गरेको देखिएको जनाएको छ ।
बैंक खातामा देखिएको कारोबारको प्रकृति, रकमको प्रवाह तथा सम्बन्धित व्यक्तिहरुसँगको सम्पर्कका आधारमा प्रहरीले थप अनुसन्धान अघि बढाएको हो । डीएसपी खड्काका अनुसार पक्राउ पर्नेमा विराटनगर महानगरपालिका–१५ रानीका ५६ वर्षीय शम्भुप्रसाद साह र विराटनगर–१७ का ३५ वर्षीय सुरजप्रसाद साह रहेका छन् ।
प्रहरीले उनीहरुमाथि मुलुकी अपराध संहिता, २०७४ अन्तर्गत हुण्डीसम्बन्धी कारोबार गर्न नहुने, संगठीत अपराध निवारण ऐन, २०७० तथा सम्पत्ति शुद्धीकरण (मनी लाउण्डरिङ) निवारण ऐन, २०६४ अन्तर्गतको कसुरमा अनुसन्धान अघि बढाएको छ । सुनसरी जिल्ला अदालतबाट पक्राउ अनुमति लिएपछि जिल्ला प्रहरी कार्यालय सुनसरीबाट खटिएको टोलीले दुवै जनालाई बिहीबार पक्राउ गरेको हो ।
पक्राउ परेका दुवै जनालाई जिल्ला प्रहरी कार्यालय सुनसरीमा राखेर कारोबारमा संलग्न अन्य व्यक्ति, प्रयोग भएका बैंक खाता, रकमको स्रोत तथा गन्तव्य र हुण्डी कारोबारको सम्भावित सञ्जालका बारेमा थप अनुसन्धान अघि बढाइएको सुनसरी प्रहरी प्रमुख एसपी पुष्पराज मल्लले बताए । उनका अनुसार दुवै जनालाई विराटनगरबाट पक्राउ गरिएको हो ।
ठूलो रकम बैंकिङ प्रणालीबाट कारोबार भएको देखिए पनि त्यसलाई मात्र आधार बनाएर सम्बन्धित व्यक्ति दोषी प्रमाणित हुने अवस्था भने हुँदैन । अनुसन्धानबाट रकमको वास्तविक स्रोत, प्रयोजन र कारोबारको कानुनी प्रकृति खुलेपछि मात्र कसुर स्थापित हुने विषय अदालतको न्यायिक प्रक्रियासँग सम्बन्धित हुने प्रहरीले जनाएको छ ।
