२ मंसिर ,
मेचीनगर,
झापाको चारआली साना शहरी तथा खानेपानी सरसफाइ उपभोक्ता समितिको चुनावमा अध्यक्षमा नेकपा माओवादी केन्द्रका राजन चिमरिया विजयी भएका छन् ।
कर्मठ समाजसेवीको व्यक्तित्व बनाएका चिमरिया दुग्ध व्यवसायी पनि हुन् । शनिवार सम्पन्न चुनावको मतगणनाको अन्तिम परिणाम अनुसार साझा प्यानलका चिमरियाले ९११ मत प्राप्त गरि विजयी भए । अध्यक्ष पदका एमालेका उम्मेद्वार सन्तोस मेचेले ४९३ र काङ्ग्रेसका तर्फबाट अध्यक्षका उम्मेद्वार बालकुमार बिष्टले २७२ मत ल्याए । उपाध्यक्ष, सचिव र कोषाध्यक्षमा समेत साझा प्यानलकै उम्मेद्वार विजयी भएका छन ।
उपाध्यक्षमा साझा प्यानलका मैया कार्कीले ६०६ मत ल्याउदा एमालेका पुष्पा गौतम खनालले ५२० मत र काङ्ग्रेसका दीपा आचार्य पौडेलले ३८५ मत ल्याइन् । सचिवमा साझा प्यानलका प्रेमराज घिमिरेले ६६४ मत प्राप्त गरी विजयी भए । सचिवमा एमालेका दामोदर घिमिरेले ५१६ मत र काङ्ग्रेसका राजेन्द्र रिजालले ३४२ मत पाए । त्यस्तै कोषाध्यक्षमा साझा प्यानलका साउन मेचेले ५७७ मत ल्याएर विजयी भए । एमालेका प्रकाश बरालले ५५८ र काङ्ग्रेसका यमकान्त पौडेलले ३७८ मत ल्याए ।
सदस्य पदमा समेत अधिकाशं साझा प्यानलकै उम्मेद्वारहरू विजयी भएका छन भने एक जना सदस्य एमालेबाट विजयी भएका छन् । सदस्यमा साझा प्यानलका पुरुषोत्तम सिग्देल, चन्दकला लिम्बु, तेजबहादुर लिम्बु, अन्जु फेवादिनले विजयी हुँदा एमालेका हरि प्रसाद घिमिरेले विजयी भएका छन् । लेखा समिति संयोजक र सदस्य पदमा समेत साझा प्यानलकै उम्मेद्वारहरु विजयी भएका छन ।
लेखा समिति संयोजकमा साझा प्यानलका अर्जुन खनाल ५३२ मत ल्याएर विजयी भए । संयोजक पदका काङ्ग्रेसका उम्मेद्वार मोहन अधिकारीले ५०८ र एमालेका संयोजक पदका उम्मेद्वार रेवत कुमार दाहालले ४७१ मत प्राप्त गरे ।
त्यस्तै लेखा समिति सदस्यहरुमा पनि साझा प्यानलकै उम्मेद्वाहरु रुद्रप्रसाद रिजाल र रितादेवी रिजाल न्यौपानेले विजयी भए । रुद्रप्रसादले ६२४ मत पाउँदा सदस्यका एमाले उम्मेद्वार श्रीप्रसाद थापाले ४७९ र काङ्ग्रेसका हरिप्रसाद रिमालले ३२८ मत पाएका थिए ।
लेखा समिति सदस्य महिलातर्फ साझा प्यानलकी रितादेवी रिजाल न्यौपानेले ५७९ मत पाउँदा एमालेका विमला मिश्रले ५३० र काँग्रेसकी जमुना देवी ओली खरेलले ३२१ मत प्राप्त गरिन् । काङ्ग्रेस र एमाले प्यानल नै उम्मेद्वार छन् भने साझा प्यानलमा नेकपा माओवादी केन्द्र, राष्ट्रिय स्वतन्त्र पार्टी (रास्वपा), राष्ट्रिय प्रजातन्त्र पार्टी (राप्रपा), सङ्घीय समाजवादी लगायतका दलहरुले संयुक्त रुपमा उम्मेद्वार चुनावी मैदानमा थिए ।
चारआली खानेपानीमा मेचीनगर नगरपालिका वडा नं ११, १२, १३ र १४ का दुई हजार ६ सय ९५ जना मतदाता मध्ये एक हजार ७ सय ८१ जनाले मतदान गरेको निर्वाचन समितिका संयोजक न्यौपानेले जानकारी दिए ।
