१२ आश्विन,
धुलाबारी । नेपाल जेसीजका राष्ट्रिय अध्यक्ष रविन पोख्रेलले भारी वर्षाका कारण देशमा उत्पन्न कठिन परिस्थितिलाई मध्यनजर गर्दै तत्काल उद्धारमा लाग्न अपिल गरेका छन् ।
क्षेत्रीय सम्मलेनमा सहभागी हुन धुलाबारी आएका अध्यक्ष पोख्रेलले समापन समारोहलाई सम्बोधन गर्दै मुलुकभर भारी वर्षाका कारण जनधनको क्षति भइरहेको अवस्थामा तुरुन्त राहत तथा उद्धारमा खटिन सबै शाखाहरुलाई निर्देशन दिएका हुन् ।
विगतदेखिनै सामाजिक उत्तरदायित्वमा जेसीज अग्रभागमा रहँदै आएको बताउँदै अध्यक्ष पोख्रेलले समग्र देशनै विपदमा रहेको बखत आआफ्नो क्षेत्रबाट जेसीजकर्मीहरु लागि पर्ने विश्वास ब्यक्त गरे ।
दुखेको घाउमा जेसीज जहिल्यै मह्लम बन्ने गरेको छ, उनले भने, ‘समाजमा हामीले गर्दै आएका सकारात्मक गतिविधिलाई एकपटक पुन: प्राकृतिक विपत्ति र प्रकोपतर्फ केन्दृत गर्न जरुरी देखिएको छ । म अहिल्यैबाट उद्धार र राहतमा लाग्न अपिल र आग्रह गर्दछु ।’
चारवटा क्षेत्र रहेको नेपाल जेसीजको क्षेत्र क अन्तर्गतको सम्मेलन झापाको धुलाबारीमा शुक्रबार र शनिबार सम्पन्न गर्ने जेसीजले यसअघिनै निर्णय गरेको थियो । सम्मेलनको आतिथ्यता धुलाबारी जेसीजले गरेको थियो ।
विभिन्न शाखाबाट ६ सयबढी जेसीजकर्मी सहभागी बन्ने दाबी आयोजकले गरेपनी मौसम प्रतिकुलताका कारण करिब ३५० को संख्यामा जेसीजका सदस्य सहभागी भएको आयोजकले बताएको छ ।
