नेपाली मिडिया जगत्को नियामक निकाय रहेको काउन्सिलका प्रमुख बस्नेतले पछिल्लो समय सामाजिक सञ्जाल र सञ्चारमाध्यम छुट्याएर हेर्नुपर्ने र त्यसका लागि डिजिटल साक्षरतामा जोड दिँदै आएका छन् ।
समाचार र सामाजिक सञ्जालका कन्टेन्टलाई चामल र भुससरह छुट्याएर हेर्नुपर्ने बाध्यता रहेको उनले बताएका छन् ।
‘युट्युब र अन्य सामाजिक सञ्जालमा राम्रासहित अनेकन् खालका नकारात्मक सामग्री पोखिएका छन् ।
त्यसलाई चामल र भुसजत्तिकै छानेर सञ्चारमाध्यमका रूपमा आएका युट्युब र अन्य युट्युब भनी छुट्याउन र चिन्नुपर्छ,’ उनले लेखेका छन् ।
प्रश्न उठाउने मात्र नभई समाधानका विकल्पसहितको पत्रकारिता गर्नुपर्ने दायित्व मिडिया जगत्मा आइपरेको उनको भनाइ छ । त्यसरी गरिने पत्रकारिता सिर्जनात्मक, रचनात्मक र समाधानमुखी हुने उनको धारणा छ । ‘प्रश्न उठाउने र समस्या राख्नेमा मात्र अबको पत्रकारिता केन्द्रित छैन ।
समाधानका सम्भावित उपाय, विकल्पसहित प्रश्न उठाउने दायित्व मिडिया जगत्मा छ । समाधान के हुन सक्छ, अहिले किन भइरहेको छैन, असल सुरुवात के भइरहेका छन्, त्यसमा बाधा के, कसरी भइरहेको छ जस्ता जिज्ञासासहितलाई मिडिया जगत्ले प्रस्तुत गर्दा सिर्जनात्मक, रचनात्मक र समाधानमुखी पत्रकारिता गरेको ठहर्छ,’ बस्नेतले लेखेका छन् ।
पछिल्लो समय प्रेस काउन्सिल नेपालले सामाजिक सञ्जालमार्फत सार्वजनिक कन्टेन्टलाई कडाइ गर्दै आएको छ ।
