घोराही, दाङ ।
साउन ६, २०८३,
दाङको घोराही उप–महानगरपालिका–१३, दुम्रगाउँस्थित बेथेल मण्डली दाङको ७ औं वार्षिकोत्सव समारोह विविध कार्यक्रमसहित भव्यताका साथ सम्पन्न भएको छ।
“जीवन परमप्रभुले हामीहरूलाई यहाँसम्म डोर्याउँदै ल्याउनुभयो“ (१ शमूएल ७ः१२) भन्ने मूल वचनलाई आधार मानेर आयोजित यस वार्षिकोत्सव कार्यक्रममा स्थानीय विश्वासी, अगुवा तथा विभिन्न मण्डलीका पास्टरहरूको उत्साहजनक उपस्थिति रहेको थियो।
बेथेल चर्च दाङका पास्टर लाल घर्ती मगर (अर्पण) ले सञ्चालन गर्नुभएको सो कार्यक्रममा मण्डलीका क्वाएर भाइ–बहिनीहरूले स्वागत गीत प्रस्तुत गर्नुका साथै ख्रीष्टिय भजनमा नृत्य र विशेष नाटक (ड्रामा) समेत प्रस्तुत गरेका थिए, जसले कार्यक्रमलाई थप आकर्षक बनाएको थियो। मत्ती १६ः१८ को वचन “म मेरो मण्डली यस चट्टान माथि स्थापित गर्नेछु…“ लाई स्मरण गर्दै आयोजित कार्यक्रममा विशेष वक्ता रेभ. प्रसाद बुढा मगर लगायत विभिन्न मण्डलीबाट पाल्नुभएका पास्टरज्यूहरूले जीवन्त बचन बोल्दै उपस्थित सबैलाई आशिष् र उत्साह प्रदान गर्नुभएको थियो। उहाँहरूले मण्डलीको आगामी यात्रा, एकता र आध्यात्मिक वृद्धिका बारेमा प्रकाश पार्नुभएको थियो।
साथै, कार्यक्रममा मण्डलीको वार्षिक आर्थिक प्रतिवेदन पनि प्रस्तुत गरिएको थियो। यस किसिमको आर्थिक प्रतिवेदन प्रस्तुत गर्नुले विश्वासीहरूबीच पारदर्शिता (पारदर्शी) कायम गर्न ठूलो सहयोग पुर्याउने कुरा कार्यक्रममा बताइएको थियो।
विगत ७ वर्षदेखि मण्डलीले पार गरेको विश्वासीय यात्रा र परमप्रभुको सहायताको सराहना गर्दै शान्त र व्यवस्थित रूपमा सम्पन्न भएको यस वार्षिकोत्सव कार्यक्रमले मण्डलीका सदस्यहरूबीच आपसी एकता, उत्साह र आत्मिक आनन्द थपेको आयोजकले जनाएका छन्।
