काँकरभिट्टा, झापा । मेचीनगरमा बाल संरक्षणको वर्तमान अवस्था सम्बन्धी अन्तरक्रिया कार्यक्रम बिहीबार काँकरभिट्टा क्याम्पसको सभाहलमा सम्पन्न भएको छ।
बाल जागरण मञ्चको आयोजनामा सम्पन्न कार्यक्रममा बालबालिकाको बेचबिखन, बालविवाह, लागूऔषधको कुलत, बालश्रम लगायत बालअधिकारसँग सम्बन्धित विविध जटिल विषयमा छलफल गरिएको थियो।
अन्तरक्रिया कार्यक्रममा यूएनडीपी (UNDP) का अनुसन्धानकर्ता दिलकुमार मगर, माइती नेपालका गोविन्द घिमिरे, नेपाल प्रहरीका प्रतिनिधि प्रहरी नायव निरीक्षक मिलनकुमारी राई , नाइट चेस क्लबका गोविन्द न्यौपाने, प्रदेश संयोजक सोमराज ढकाल, बाल जागरण मञ्चका मणिकुमार लिम्बू, महिला जनचेतना केन्द्रकी मनिला उप्रेती तथा नव अभियान नेपालका डिल्ली राम थापा मगरलगायतले आफ्नो धारणा राख्नुभएको थियो।
कार्यक्रममा वक्ताहरूले आ–आफ्नो क्षेत्रबाट बाल संरक्षणका लागि भइरहेका प्रयासबारे जानकारी गराउँदै स्थानीय तह, विशेषगरी नगरपालिका र वडा कार्यालयहरूको भूमिकाप्रति असन्तोष व्यक्त गरेका थिए। साथै, बाल संरक्षण तथा बालअधिकार प्रवर्द्धनका लागि नगरपालिकाले नेतृत्वदायी भूमिका निर्वाह गर्नुपर्ने आवश्यकता औँल्याएका थिए। यद्यपि, बजेट अभावका कारण कतिपय कार्यक्रम तथा योजनाहरू प्रभावकारी रूपमा कार्यान्वयन गर्न चुनौती रहेको धारणा पनि व्यक्त गरिएको थियो।
वक्ताहरूले समाजलाई उत्तरदायी र जिम्मेवार बन्नुपर्ने आवश्यकता औँल्याउँदै बालबालिका सम्बन्धी सवालमा सरकारसँग रचनात्मक तथा आलोचनात्मक रूपमा वकालत गर्नुका साथै समन्वय र सहकार्यलाई समेत सुदृढ बनाउनुपर्नेमा जोड दिएका थिए।
कार्यक्रमले बाल संरक्षणका क्षेत्रमा सरोकारवाला निकायबीच सहकार्य, समन्वय र साझा प्रतिबद्धताको आवश्यकता रहेको निष्कर्ष निकालेको थियो।
