१३ जेष्ठ २०८३, बुधबार,
एजेन्सी । अमेरिकी राष्ट्रपति डोनाल्ड ट्रम्पले इरानलाई आत्मसमर्पण गर्न चेतावनी दिएका छन् । आफ्नो सामाजिक सञ्जाल ‘ट्रुथ सोसल’मा प्रकाशित पोस्टमार्फत उनले इरानले आफ्नो सैन्य क्षमताको विनाश स्वीकार गर्दै पूर्ण रूपमा हतियार बिसाउनुपर्ने बताएका हुन्।
ट्रम्पले दाबी गरेका छन् कि इरानको नौसेना “समाप्त भएर समुद्रको फेदमा पुगेको” र वायुसेना “अब अस्तित्वमा नरहेको” अवस्था छ। उनले थप व्यंग्यात्मक शैलीमा लेख्दै भनेका छन्, यदि इरानी सेना हतियार त्याग्दै “म आत्मसमर्पण गर्छु” भन्दै बाहिर निस्किए पनि र नेतृत्वले औपचारिक रूपमा हार स्वीकार गरे पनि त्यसले अन्तर्राष्ट्रिय मिडियाको धारणा परिवर्तन नगर्ने उल्लेख गरे।
उनले न्यूयोर्क टाइम्स, वाल स्ट्रिट जर्नल, सीएनएन लगायतका मिडियालाई लक्षित गर्दै ती संस्थाहरूले वास्तविकता तोडमोड गरेर इरानको जित भएको झुटो चित्रण गर्न सक्ने आरोप पनि लगाए। ट्रम्पका अनुसार, “डेमोक्र्याट र मुख्यधाराका मिडिया सत्यबाट टाढा भइसकेका छन्” र उनीहरू “भ्रम फैलाउने अभियानमा संलग्न छन्।”
त्यसैगरी, उनले इरानी नेतृत्वले आत्मसमर्पणसम्बन्धी कागजातमा हस्ताक्षर गरेर अमेरिकाको शक्ति र प्रभावलाई स्वीकार गर्नुपर्ने माग दोहोर्याएका छन्। हालैका दिनहरूमा इरान र अमेरिकाबीच बढ्दो तनावका बीच ट्रम्पको यो अभिव्यक्ति आएको हो ।
