नेपाल–भारत क्रस बोर्डर समन्वय बैठक सम्पन्न

काँकरभिट्टा । नव अभियान नेपाल शाखा कार्यालय काँकरभिट्टाको आयोजनामा नेपाल–भारत क्रस बोर्डर कोर्डिनेशन मिटिङ सम्पन्न भएको छ। कार्यक्रममा संस्थाका कार्यकारी निर्देशक सबिना श्रेष्ठको अध्यक्षता रहेको थियो।

कार्यक्रमका प्रमुख अतिथि इलाका प्रहरी कार्यालय काँकरभिट्टाका डीएसपी निशेष चापागाई रहेका थिए भने विशिष्ट अतिथिका रूपमा मेचीनगर वडा नं. ६ का अध्यक्ष ललित बहादुर तामाङ तथा कञ्चनजंघा उद्धार केन्द्र, सिलगुरीका प्रभात पाठकको उपस्थिति रहेको थियो।

त्यस्तै अतिथिहरूमा सशस्त्र प्रहरी बल नेपालका प्रहरी नायव निरीक्षक भरत धमला, महिला, बालबालिका तथा ज्येष्ठ नागरिक सेवा केन्द्रका प्रहरी नायव निरीक्षक मिलन कुमारी राई, कञ्चनजंघा उद्धार केन्द्रका रंगु शौरिया, राजु नेपाली तथा तेजकुमार थापाले आफ्ना धारणा राखेका थिए।

कार्यक्रममा नेपाल–भारत सीमाक्षेत्रमा हुने मानव बेचबिखन नियन्त्रणका लागि दुवै देशबीच प्रभावकारी समन्वय आवश्यक रहेकोमा जोड दिइयो। सहभागीहरूले सीमावर्ती क्षेत्रमा सक्रिय संस्थाहरू र सुरक्षा निकायबीच सहकार्यलाई अझ मजबुत बनाउँदै अगाडि बढ्नुपर्ने आवश्यकता औंल्याए। यसले नेपाल–भारतबीचको सम्बन्धलाई थप सुदृढ बनाउने विश्वास व्यक्त गरिएको थियो।

कार्यक्रमको सञ्चालन तथा स्वागत मन्तव्य नव अभियान नेपाल शाखाकी वरिष्ठ कर्मचारी अनिता गुरागाईंले गरेकी थिइन्। कार्यक्रममा संस्थाका सम्पूर्ण कर्मचारीहरूको सहभागिता रहेको थियो।