झापा । मोरङमा बर्ड फ्लु संक्रमण तीव्र रूपमा फैलिँदै जाँदापनि सम्बन्धित निकायको ढिलासुस्ती र लापरवाहीका कारण जोखिम झन् बढ्दै गएको देखिएको स्थानीयले गुनासो गरेका छन् ।
संक्रमण पुष्टि हुन करिब ४ दिन लागेको र त्यसपछि पनि नियन्त्रणका लागि आवश्यक कदम चाल्न थप समय लाग्दा उक्त क्षेत्रमा ६ दिनसम्म कुनै सुरक्षा सतर्कता अपनाइएको थिएन् । सम्बन्धित निकायको ढिलासुस्ती र लापरवाहीका कारण संक्रमण फैलने जोखिम अझ बढाएको दाहाल कृषि फर्मका सञ्चालक बोधराज दाहालले बताए।
पन्छीरोग विज्ञ डा. मनिष कुमार साहले मापदण्ड विपरीत कुखुरा फर्म सञ्चालन हुनु र आवश्यक जैविक सुरक्षा बायोसेक्युरिटी नअपनाइनु संक्रमण फैलिनुको मुख्य कारण भएको बताए।
नियमावली अनुसार प्रभावित क्षेत्र घोषणा गरी कडाइका साथ नियन्त्रण उपाय लागू गर्नुपर्ने भए पनि त्यसको पालना नहुँदा संक्रमण अन्य क्षेत्रमा फैलिने खतरा बढेको विज्ञहरूको चेतावनी छ । संक्रमण नियन्त्रणमा ढिलाइ, नियमावलीको कमजोर कार्यान्वयन र किसानको बढ्दो क्षतिले मोरङमा बर्ड फ्लु संकट थप गम्भीर बन्दै गएको छ ।
