धुलाबारी । झापा–१ का मतदातालाई उम्मेद्वारसँग सिधा प्रश्न–उत्तर गर्ने अवसर प्रदान गर्ने उद्देश्यले नेपाल जेसीज अन्तर्गत मेचीनगर क्षेत्रका जेसीज शाखाहरूले संयुक्त रूपमा ककस (प्रत्यक्ष संवाद) कार्यक्रम आयोजना गर्ने भएका छन्।
धुलाबारी जेसीज, मेचीनगर लेडी जेसीज, बाहुनडाँगी जेसीज र चारआली जेसीजको सहकार्यमा फागुन १२ गते धुलाबारीमा कार्यक्रम हुने जानकारी दिइएको छ। आयोजकका अनुसार झापा–१ का सबै उम्मेद्वारलाई औपचारिक निम्तो पठाइसकिएको छ र अधिकांश उम्मेद्वारले सहभागिताको प्रतिबद्धता जनाइसकेका छन्।
कार्यक्रममा मतदाताले आफ्ना जिज्ञासा र चासोका विषय प्रत्यक्ष रूपमा उम्मेद्वारसमक्ष राख्न पाउनेछन् भने उम्मेद्वारहरूले आफ्ना धारणा र योजनाबारे स्पष्ट पार्ने अवसर पाउनेछन्। यसले मतदाता र उम्मेद्वारबीच खुला संवादको वातावरण सिर्जना गर्ने अपेक्षा गरिएको आयोजकले जनाएको छ।
ककस कार्यक्रम धुलाबारीस्थित पासाङल्हामू स्मृति जेसीज प्रतिष्ठान टाउन हल मा दिउँसो १२ बजेदेखि सुरु हुनेछ। कार्यक्रम सञ्चालन धुलाबारी जेसीजका पूर्व अध्यक्ष केशव पोखरेलले गर्ने तय भएको छ।
पत्रकार सम्मेलनमा विभिन्न जेसीज शाखाका पदाधिकारी तथा सदस्यहरूको उपस्थिति रहेको थियो। मेचीनगर लेडी जेसीजका प्रतिनिधिले कार्यक्रम सफल पार्न सहयोग गर्ने सबैप्रति आभार व्यक्त गरेका थिए।
झापा–१ मा दुई स्वतन्त्र उम्मेद्वारसहित १५ जना प्रतिस्पर्धामा रहेका छन्।
