१९ माघ २०८२, सोमबार.
काठमाडौँ ।
प्रधानमन्त्री सुशीला कार्कीले तोकिएको समयमा स्वच्छ, निष्पक्ष र भयरहित वातावरणमा प्रतिनिधि सभाको निर्वाचन सम्पन्न हुने विश्वास व्यक्त गर्नुभएको छ।
राष्ट्रिय सभाको १९औँ अधिवेशनअन्तर्गत आज भएको पाँचौँ बैठकलाई पहिलोपटक सम्बोधन गर्दै प्रधानमन्त्री कार्कीले प्रतिनिधि सभा सदस्य निर्वाचनको तयारी तथा सुशासनका क्षेत्रमा सरकारले गरिरहेका कामबारे सभासद्हरूलाई जानकारी गराउनुभयो। उहाँले आफू कुनै शासकीय आकाङ्क्षा बोकेर नभई विषम परिस्थितिमा प्रधानमन्त्री बनेको स्पष्ट पार्दै तोकिएको समयमा निर्वाचन सम्पन्न गरी नयाँ सरकारलाई जिम्मेवारी हस्तान्तरण गर्न आतुर रहेको बताउनुभयो।
प्रधानमन्त्री कार्कीले गत भदौ २३ र २४ गतेको जेनजी आन्दोलनको पृष्ठभूमिमा गठन भएको अन्तरिम सरकारको नेतृत्व आफूले सम्हालेको उल्लेख गर्नुभयो। साथै, हालै सम्पन्न राष्ट्रिय सभाको निर्वाचनमा विजयी भएका सदस्यहरूलाई बधाई समेत दिनुभयो।
उहाँले ‘विकास, आर्थिक मामिला तथा सुशासन’ समितिका सभापति कमला पन्तद्वारा प्रस्तुत ‘राष्ट्रिय सदाचार नीतिसम्बन्धी अध्ययन प्रतिवेदन, २०८२’ माथिको छलफलका क्रममा उठेका प्रश्नहरूको जवाफ पनि दिनुभयो।
