१३ माघ २०८२, मंगलवार,
मेचीनगर । अपाङ्गमैत्री भवन निर्माण गर्ने उद्देश्यसहित अपाङ्गमैत्री सेवा स्वरोजगार संस्था मेचीनगर–१० ले सप्ताह पुराण महायज्ञ आयोजना गर्ने भएको छ । भवनको अभावका कारण कार्यालय सञ्चालनमा समस्या भोग्दै आएको संस्थाले आवश्यक आर्थिक स्रोत जुटाउन महायज्ञ गर्न लागेको हो ।
मंगलबार आयोजित पत्रकार भेटघाट कार्यक्रममा संस्थाले मेचीनगरभरिका ४५ जना फरक क्षमता भएका सदस्यहरूको हितका लागि भवन निर्माण योजना अघि बढाएको जानकारी गराएको छ । भवन निर्माणको योजनापछि केही व्यक्ति तथा संस्थाबाट सहयोगको प्रतिबद्धता प्राप्त भएपछि महायज्ञ आयोजना गर्ने निर्णय गरिएको संस्थाका अध्यक्ष राम बुढाथोकीले बताए ।
उनका अनुसार आगामी फागुन ६ गतेदेखि १४ गतेसम्म महायज्ञ सञ्चालन हुनेछ । मेचीनगर–१४ का वडाध्यक्ष बाबुलाल सुब्बाले भवन निर्माणका लागि ६ लाख रुपैयाँ सहयोग गर्ने प्रतिबद्धता जनाइसकेको अध्यक्ष बुढाथोकीले जानकारी दिए । अन्य व्यक्तिहरूले पनि सहयोग गर्ने आश्वासन दिएको उनले बताए ।
महायज्ञ आयोजनाका लागि करिब १२ लाख रुपैयाँ खर्च हुने र २५ लाख रुपैयाँ संकलन गर्ने लक्ष्य राखिएको छ । पुराणमा पण्डित देबिसुमि मानव प्रमुख कथा वाचक रहने छन् भने कार्यक्रम सञ्चालन बिष्णु प्रसाईंले गरेका थिए । कार्यक्रमलाई व्यवस्थित रूपमा सञ्चालन गर्न पुराण व्यवस्थापन समिति गठन गरी अघि बढ्ने अध्यक्ष बुढाथोकीले बताए ।
हाल संस्थाले अव्यवस्थित रूपमा सञ्चालनमा रहेको सामुदायिक सेवा केन्द्र लालपानीको एउटा कोठामा कार्यालय राख्दै आएको छ । उक्त कोठाबाट पनि कार्यालय हटाउन भनिएपछि संस्था थप अन्यौलमा परेको अध्यक्ष बुढाथोकीले गुनासो गरे ।
