ईलाम । माई नगरपालिका ईसाई समाजको आयोजनामा ईलामको सुखानीस्थित सहिद स्मृति फनपार्क मा संयुक्त ख्रिष्टमस कार्यक्रम भव्य रूपमा सम्पन्न भएको छ।
जिल्ला ईसाई समाज ईलामका अध्यक्ष टेक बहादुर राई को प्रमुख आतिथ्यतामा तथा माई नगरपालिका ईसाई समाजका अध्यक्ष धनकुमारी राई लिम्बू को अध्यक्षतामा आयोजित कार्यक्रममा माई नगरपालिका र अर्जुनधारा नगरपालिका अन्तर्गतका विभिन्न चर्चहरूको उल्लेखनीय तथा गरिमामय उपस्थिति रहेको थियो।
ख्रिष्टमस कार्यक्रमको अवसरमा शुभकामना आदान–प्रदान गर्दै प्रमुख अतिथि पास्टर टेक बहादुर राई ले ख्रिष्ट येशु संसारका मुक्ति दाता हुनुहुन्छ भन्ने सन्देश दिनुभएको थियो। उहाँले ख्रिष्टमसले प्रेम, शान्ति, क्षमा र आपसी सद्भावको सन्देश फैलाउने उल्लेख गर्नुभयो।
कार्यक्रमलाई थप उत्साहपूर्ण बनाउन विभिन्न खालका ख्रिष्टमस गीत, भजन तथा नृत्य प्रस्तुत गरिएका थिए। सांस्कृतिक प्रस्तुतिहरूले उपस्थित सहभागीहरूलाई आनन्दित बनाउँदै आपसी खुसी साटासाट गर्ने वातावरण सिर्जना गरेको थियो।
कार्यक्रमको सञ्चालन माई नगरपालिका ईसाई समाजका सचिव डम्बर खजुम ले गर्नुभएको थियो।
