१७ मंसिर २०८२, बुधबार,
ईलाम । माई नगरपालिका क्षेत्रमा श्रम संस्कृति पार्टीको संगठन विस्तार तीव्र गतिमा अघि बढिरहेको छ। हालै माई–६ मा वडा समिति र मंसिर ४ गते नगर समिति गठनसँगै विभिन्न वडाबाट पार्टी प्रवेशको लहर देखिएको पार्टीले जनाएको छ।
यसै क्रमअन्तर्गत माई–२ स्थित सितली खेल मैदानमा अटो तथा टेम्पो व्यवसायीहरूको निमन्त्रणामा आयोजित कार्यक्रममा अटो व्यवसायी समितिका अध्यक्ष दिलकुमार राई (दिल कु राई) नेतृत्वको २६ अटो सञ्चालक समूह श्रम संस्कृति पार्टीमा औपचारिक रूपमा प्रवेश गरेको हो।
कार्यक्रमलाई पार्टी केन्द्रीय सदस्य लक्ष्मी राई, ईलाम जिल्ला अध्यक्ष दिपक राई तथा माई नगर अध्यक्ष बिनोद लिम्बूले स्वागत गरेका थिए। नयाँ प्रवेशीहरूलाई खदा र अबिरले सम्मान गरिएको थियो।
यता, माई नगरपालिका–४ का खड्ग यक्तेनकी छोरी सुएनो यक्तेनले अस्ट्रेलियाबाट संगठन विस्तार तथा श्रम अभियानका लागि ३५ हजार रुपैयाँ आर्थिक सहयोग पठाएको नगर अध्यक्ष लिम्बूले समारोहमा सार्वजनिक गरे।
श्रम संस्कृति पार्टीले माई नगरमा आगामी दिनहरूमा संगठन सुदृढीकरण तथा सदस्यता अभियानलाई अझ व्यापक बनाइने जनाएको छ।
