१६ बैशाख २०८३, बुधबार,
मेचीनगर । झापा काँकरभिट्टा–धुलाबारी–धाइजन–चारआली–बिर्तामोड सडक खण्डमा साँझपख लोकल सवारी साधनहरूले मनपरी भाडा असुल्ने गरेको भन्दै यात्रुहरूबाट व्यापक गुनासो आएको छ। विशेषगरी म्याजिक, टेम्पो तथा माइक्रोबसहरूले नियमित समयभन्दा फरक गरी दोब्बर भाडा लिने प्रवृत्ति बढ्दै गएको यात्रुहरू बताउँछन्।
यात्रुहरूको भनाइ अनुसार काँकरभिट्टादेखि धाइजनसम्म सामान्य अवस्थामा ३० देखि ३५ रुपैयाँ भाडा लाग्ने भए पनि साँझ परेसँगै सोही दूरीका लागि ६० /७० रुपैयाँसम्म असुल्ने गरिएको छ। “जाने भए जाऊ, नजाने भए नजाऊ” भन्ने शैलीमा चालक तथा सहचालकले यात्रुलाई दबाब दिने गरेको समेत गुनासो आएको छ।
हाल अन्तर्राष्ट्रिय स्तरमा देखिएको इरान, अमेरिका र इस्राएलबीचको तनावका कारण इन्धनको मूल्य वृद्धि भएको प्रभाव नेपालमा पनि परेको छ। तर, इन्धनको मूल्य बढ्दैमा सार्वजनिक सवारी साधनले आफूखुसी भाडा बढाउन नपाउने व्यवस्था रहेको छ। भाडा समायोजन गर्ने अधिकार सम्बन्धित सरकारी निकायसँग मात्र रहने प्रावधान छ।
स्थानीय यात्रुहरूका अनुसार साँझपख सवारी साधनको संख्या कम हुने र अनुगमन कमजोर हुने अवस्थालाई फाइदा उठाउँदै केही चालकहरूले यात्रुको बाध्यता प्रयोग गरेर बढी भाडा असुल्ने गरेका छन्। यसले दैनिक आवतजावत गर्ने सर्वसाधारण, विद्यार्थी तथा कामदार वर्गलाई प्रत्यक्ष मार परेको छ।
यातायात सम्बन्धी नियमअनुसार प्रत्येक सवारी साधनमा आधिकारिक भाडा दर सूची टाँस्नुपर्ने हुन्छ। तर व्यवहारमा भने धेरै सवारी साधनले सो नियम पालना नगरेको पाइएको छ। यसप्रति सम्बन्धित निकायको ध्यानाकर्षण गराउँदै यात्रुहरूले प्रभावकारी अनुगमन र कारबाहीको माग गरेका छन्।
यात्रुहरू भन्छन्, “हामीसँग विकल्प छैन, त्यसैले बाध्य भएर बढी तिर्नुपर्छ। तर यसरी दैनिक शोषण सहनु परेको छ।”
यस समस्याको दीर्घकालीन समाधानका लागि सम्बन्धित निकायले नियमित अनुगमन, स्पष्ट भाडा कार्यान्वयन र यात्रु सचेतनामा जोड दिन आवश्यक देखिएको छ।
