ब्रसेल्स । फासिवाद, युद्ध र वातावरणीय विनाश विरुद्ध साम्राज्यवाद विरोधी अग्रगामी युद्धको घोषणा गर्दै साम्राज्यवाद र फासिवाद विरोधी अन्तर्राष्ट्रिय संयुक्त मोर्चाको प्रथम विश्व सम्मेलन सम्पन्न भएको छ । सम्मेलनले नेपालबाट सुवास जिसीलाई उपाध्यक्षमा चयन गरेको छ ।
नवनिर्वाचित सहअध्यक्ष सुवाज जि.सी.सँग अन्तर्राष्ट्रिय सम्मेलनको बारेमा सम्पर्क गर्दा, ‘युनाइटेड फ्रन्टको प्रथम सम्मेलन उत्साहप्रद रूपमा सम्पन्न भएको तथा निर्वाचित नयाँ समितिको छिटै बैठक बसेर विस्तृत योजनाहरू बनाइने’ बताउनुभयो ।
विश्वका करिब ४६ देशका १२४ प्रतिनिधिसहित करिब ६५० सहभागीको उपस्थितिमा सेप्टेम्बर ३ देखि ६ (२०२३) सम्म जर्मनीमा सो सम्मेलन सम्पन्न भएको हो ।
अन्तर्राष्ट्रिय सम्मेलनले नौ सदस्यीय नयाँ समिति निर्वाचित गरेको छ ।
पेरूका एडिथ लुज र जर्मनीबाट मोनिका गार्टनर–एङ्गेल अध्यक्षका रूपमा निर्वाचित भएका छन् । नेपाल, पेरु र ट्युनिसियाबाट तीन जना युवाहरू सह अध्यक्षको रूपमा निर्वाचित भएका छन् । समितिमा नेपालको तर्फबाट सुवास जिसी निर्वाचित भएका हुन् । समितिमा टर्की, जर्मनी, पेरु, पश्चिमी सहारा, साइप्रस र दक्षिण अफ्रिकाका प्रतिनिधि निर्वाचित भएका छन् ।
छ ओटा मुख्य राजनैतिक सङ्कल्पलाई सर्वसम्मत रूपमा पास गर्दै “भविष्यमा संसारको कुनै पनि सङ्घर्षलाई एक्लै उभिन दिइने छैन” भन्ने प्रण गर्दै उक्त सम्मेलन सम्पन्न भएको छ ।
सम्मेलनमा भाग लिन नेकपा (मसाल) को तर्फबाट अखिल नेपाल बुद्धिजीवी सङ्घका केन्द्रीय अध्यक्ष प्रा.डा. श्रीधर गौतमसहितका प्रतिनिधिहरू जर्मन जानुभएको थियो ।
युनाइटेड फ्रन्टले विश्व सम्मेलनलाई विश्व साम्राज्यवाद विरुद्धको विजयी अभियानको रूपमा औँल्याएको छ । साम्राज्यवादीहरूले सम्मेलनलाई असफल बनाउन प्रयत्न गरे पनि भव्य रूपमा सम्पन्न भएको थियो । त्यस क्रममा विभिन्न १८ देशका ३० भन्दा बढी सहभागीका भिसा अस्वीकार गरिएको थियो । यसलाई फ्रन्टले साम्राज्यवादीहरूको “मूल्यमा आधारित परराष्ट्र नीति” ले प्रतिक्रियावादीको मूल्यको संरक्षण गरेको भनेर विरोध गरेको छ ।
सम्मेलनले विधानसँग सम्बन्धित १०० भन्दा बढी प्रस्तावको गहन छलफल गरी सर्वसम्मतिले अनुमोदन गरेको छ । अहिले युनाइटेड फ्रन्टलाई “फासिवाद, युद्ध र वातावरणीय विनाश विरुद्धको अन्तर्राष्ट्रिय साम्राज्यवाद विरोधी संयुक्त मोर्चा” को नाम दिइएको छ । त्यसको छोटो नाम “युनाइटेड फ्रन्ट” (संयुक्त मोर्चा) भनिएको छ ।
