मेचीनगर । नगर स्तरीय दलित समन्वय समिति मेचीनगरले आयोजना गरेको मेचीनगर स्तरीय अन्तर मावि वक्तृत्वकला प्रतियोगिताको उपाधि धुलाबारी माविकी दिब्या रायाले जितेकी छिन् । उपाधि जितेसँगै उनले नगद १० हजार १ सय २५ रुपैयाँ नगद, प्रमाणपत्र तथा मेडल प्राप्त गरिन् ।
मेचीनगर-८, स्थित आदर्श मावि परिसरमा बिहीबार सम्पन्न प्रतियोगिताको दोश्रो र तेस्रो क्रमशः ओसिएनिक निर्माण अंग्रेजी मावि बाहुनडाँगीका रिदम दुलाल, मेचीनगर १३ स्थित सरस्वती बाल कल्याण माविकी प्रोशिमा घिमिरे भइन् ।
दोस्रो रिदम दुलालले ७ हजार १ सय २५ प्राप्त गरे भने तेश्रो स्थान हासिल गर्न सफल प्रोशिमा घिमिरेले ५ हजार २ सय ५० रुपैयाँ, मेडल र प्रमाणपत्र प्राप्त गरे । विजेतालाई शिक्षा शाखा प्रमुख होमनाथ भण्डारी, मेचीनगर ८ का वडाध्यक्ष गिरीराज धमलालगायतका अतिथिहरुले पुरस्कार तथा प्रमाणपत्र वितरण गरेका थिए ।
‘जातीय विभेद र छुवाछुतको अन्त्य, समृद्ध र समतामुलक समाज हाम्रो गन्तव्य’ भन्ने शीर्षक भएको वक्तृत्वकला प्रतियोगितामा ३ दिनको छनौट चरणमार्फत ३४ विद्यालयका ६५ सहभागी मध्ये उत्कृष्ट १२ जना फाइनल प्रवेश गरेका थिए ।
कार्यक्रममा प्रमुख अतिथि मेचीनगर नगर प्रमुख गोपालचन्द्र बुढाथोकीले नगरले विद्यार्थीको पहिचान गर्ने कार्यक्रममा लगानी गरेको बताए । उनले हरेक विद्यार्थीमा चेतनाको स्तर वृद्धि हुँदै समाज रुपान्तरण र विकासमा मद्धत पुग्ने विश्वास ब्यक्त गरे ।
नगरप्रमुख बुढाथोकीले बोल्ने कलाको विकाससँगै भविष्यमा हरेक क्षेत्रमा नेतृत्व गर्ने गरिको जनशक्ति निर्माण गर्न यस किसिमका कार्यक्रमले मद्धत गर्ने आफूले विश्वास लिएको बताए ।
सो अवसरमा शिक्षा शाखा प्रमुख भण्डारी, वडाध्यक्ष धमला, आदर्श माविका प्रअ कृष्ण पुरी, प्याब्सन मेचीनगर अध्यक्ष डम्बर रुचाललगायतले शुभकामना मन्तब्य राखेका थिए । कार्यक्रममा नगर उपप्रमुख मिना पोखरेल उप्रेती, प्रमुख प्रशासकीय अधिकृत अग्निप्रसाद अधिकारी, कार्यपालिका सदस्य, जनप्रतिनिधि, राजनीतिक दलका प्रमुख तथा प्रतिनिधि, संघ संस्था, पत्रकार, विभिन्न विद्यालयका प्रअ तथा शिक्षकहरु सहभागी थिए ।
मेचीनगर नगरपालिकाको आर्थिक सहयोग रहेको प्रतियोगिताको निणर्ायकमा प्राध्यापक प्रेमसागर घिमिरे, पूर्व शिक्षक राजकुमार विश्वकर्मा र सञ्चारकर्मी शुष्मा राजवंशी रहेका थिए । आयोजक समितिका अध्यक्ष रिता परियारको सभापतित्वमा सम्पन्न फाइनल प्रतियोगितामा स्वागत समितिका उपाध्यक्ष लक्ष्मी परियार र सञ्चालन शिक्षक जीआर धितालले गरेका थिए ।
