मेचीनगर । मच्छिन्द्र फुटबल क्लब र एपीएफ मेचीनगरमा जारी पाँचौं मेचीनगर गोल्डकपको सेमिफाइनल प्रवेशका लागि मंगलबार (आज) प्रतिष्पर्धा गर्दैछन् ।
काँकरभिट्टा खेल मैदानमा ए डिभिजन क्लब मच्छिन्द्र एफसी काठमाडौं र विभागीय टिम सशस्त्र प्रहरीको एपीएफ एफसी काठमाडौंबीचको क्वाटरफाइनल खेलबाट विजेता सेमिफाइनल पुग्ने अन्तिम टोली बन्नेछ । खेलको विजेताले सेमिफाइनलमा फागुन २९ गते बिहीबार लिग लिडर चर्च ब्वाइज यूनाइटेडसँग खेल्नेछ ।
काँकरभिट्टा फुटबल ट्रेनिङ सेन्टरको आयोजनामा सञ्चालित मेचीनगर गोल्डकपको पाँचौं संस्करणमा आजको खेलसँगै सेमिफाइनल समीकरण पूरा हुनेछ ।
यसअघि सोमबार भएको खेलमा उज्वेकिस्तानको ब्ल्याक बुल्स एफसीलाई पराजित गर्दै धरान एफसी सेमिफाइनलमा प्रवेश गरिसकेको छ । धरानले पहिलो सेमिफाइनलमा आयोजकसँग खेल्ने छ । आयोजक काँकरभिट्टा फुटबल ट्रेनिङ सेन्टरले जर्जियन एफसीलाई पाखा लगाउँदै सेमिफाइनल यात्रा तय गरेको थियो ।
चैत २ गते हुने फाइनल खेलको विजेताले नगद १० लाख, ट्रफी र मेडल पाउनेछ भने उपविजेताले नगद पाँच लाख, ट्रफी र मेडल प्राप्त गर्ने छ ।
त्यस्तै, प्रतियोगिताको सर्वोत्कृष्ट खेलाडीले नगद ५१ हजार र ट्रफी पाउँदा उच्च गोलकर्ताले नगद २५ हजार र ट्रफी पाउने छन् । उत्कृष्ट प्रशिक्षक र गोलरक्षकले नगद २१ हजार र ट्रफी तथा उदीयमान खेलाडीले नगद ११ हजार र ट्रफी पाउने छन् । प्रत्येक दिनको प्लेयर अफ द म्याचले नगद ११ हजार र ट्रफी पाउने छन् ।
झापा जिल्ला फुटबल संघ र मेचीनगर नगर खेलकुद विकास समितिको प्राविधिक सहयोग रहेको प्रतियोगिताको संरक्षकमा मेचीनगर नगरपालिका संरक्षक तथा मुख्य प्रायोजक धुलाबारीको होटल मेची क्राउन रहेको छ ।
