९ भाद्र २०८३, मंगलवार,
काठमाडौं ।
महिला प्रहरीमाथि गालीगलौज तथा हातपात गरेको आरोपमा पक्राउ परेका एक युवकलाई पाँच दिन हिरासतमा राख्न जिल्ला प्रशासन कार्यालय काठमाडौंले अनुमति दिएको छ।
काठमाडौंको नयाँ बानेश्वरमा मंगलबार बिहान आकाशेपुल प्रयोग गरी बाटो काट्न आग्रह गर्दा पैदलयात्री राज कठायतले प्रहरीसँग विवाद गरेका थिए। सो क्रममा उनले गालीगलौज गर्नुका साथै महिला प्रहरीमाथि हातपात गरेको प्रहरीले जनाएको छ।
घटनालगत्तै प्रहरीले कठायतलाई नियन्त्रणमा लिएको थियो। उनीमाथि थप अनुसन्धानका लागि जिल्ला प्रशासन कार्यालय काठमाडौंले पाँच दिनको म्याद थप गरेको जिल्ला प्रहरी परिसर काठमाडौंका प्रवक्ता एसपी दानबहादुर थापाले जानकारी दिए।
प्रहरीका अनुसार कठायतमाथि दुईवटा कसुरमा अनुसन्धान भइरहेको छ। राष्ट्रसेवकलाई काममा बाधा पुर्याएको तथा अभद्र व्यवहार गरेको आरोपमा उनीमाथि अनुसन्धान अघि बढाइएको एसपी थापाले बताए।
जुम्लाको तातोपानी गाउँपालिका–२ स्थायी ठेगाना भएका २७ वर्षीय कठायत हाल काठमाडौं महानगरपालिका–३१ मा बस्दै आएका छन्।
