१८ मंसिर २०८२, बिहीबार,
झापा । पूर्वी नाका काँकरभिट्टालगायतका क्षेत्रमा लागूऔषध तथा मानव बेचबिखनका घटनाहरू बढ्दै गएपछि सरोकारवालामा चिन्ता बढेको छ। नेपाल प्रहरी प्रदेश कार्यालय धरानले लागूऔषध तथा लैङ्गिक हिंसा विरुद्धको १६ दिने अभियानअन्तर्गत बिहीबार एकदिने अन्तरक्रिया कार्यक्रम आयोजना गरेको छ।
इलाका प्रहरी कार्यालय काँकरभिट्टाको सभाहलमा सम्पन्न कार्यक्रममा वरिष्ठ उपरीक्षक ज्ञानेन्द्र प्रसाद फुयाँलले लागूऔषध र अन्य अपराधिक गतिविधि बढ्दै गएको प्रति गम्भीर चिन्ता व्यक्त गर्नुभएको थियो। उहाँले भने, “लागूऔषध र मानव बेचबिखन विरुद्धको अभियान प्रारम्भ त भएको छ, तर यसलाई पूर्ण रूपमा नियन्त्रण गर्न अझै धेरै काम गर्न बाँकी छ।”
कार्यक्रममा प्रहरी निरीक्षक जस बहादुर लिम्बु तथा विभिन्न संघसंस्थाका प्रतिनिधिहरू उपस्थित थिए। सहभागी सरोकारवालाले लागूऔषध र मानव बेचबिखन जस्ता जघन्य अपराधमा संलग्नलाई कडा कानुनमार्फत दण्डित गर्नुपर्ने माग राखेका थिए।
साथै, प्रहरी नेतृत्वले आम नागरिक र समुदायको सक्रिय सहभागिताले नै लागूऔषधको कारोबार र सेवनलाई प्रभावकारी रूपमा नियन्त्रण गर्न सकिने बताए। पछिल्ला समयमा नाकामा बढ्दो निगरानीका बाबजुद पनि यी अपराधका घटनाहरू बढ्दै गएपछि स्थानीयवासीहरू चिन्तित बनेका छन्।
