१७ भाद्र २०८३, बुधबार,
झापा ।
सशस्त्र प्रहरी बल, नेपालले झापाको सीमावर्ती क्षेत्रमा निगरानी तथा सूचना संकलनलाई थप प्रभावकारी बनाउन ‘गोप्रो क्यामेरा’ प्रयोगमा ल्याएको छ।
सशस्त्र प्रहरीका अनुसार गोप्रो क्यामेराको प्रयोगले सीमा क्षेत्रमा हुने गतिविधिको निगरानी, सूचना संकलन तथा कुनै घटना भएमा प्रमाण सुरक्षित राख्न समेत सहयोग पुग्ने अपेक्षा गरिएको छ।
हाल झापास्थित सशस्त्र प्रहरी गणसँग रहेका दुई वटा गोप्रो क्यामेरा परिचालन गरिएको छ। विशेषगरी नेपाल–भारत सीमाको काकडभिट्टामा परिचालित बोर्डर इन्टरएक्सन टिम (बीआईटी) ले क्यामेराको प्रयोग गरिरहेको छ। सशस्त्र प्रहरीका अनुसार सीमा सुरक्षाका लागि बीआईटीमार्फत गोप्रो क्यामेरा प्रयोग गरिएको यो अभ्यास नेपालमै पहिलो हुनसक्ने बताइएको छ।
झापामा सशस्त्र प्रहरी उपरीक्षक सचिन कर्माचार्य गणपतिको जिम्मेवारीमा सरुवा भएर आएपछि सीमा सुरक्षा र तस्करी नियन्त्रणलाई प्राथमिकतामा राखेर गतिविधि तीव्र पारिएको छ।
सीमा क्षेत्रमा हुने अवैध ओसारपसार तथा तस्करी नियन्त्रणका लागि निगरानी बढाउनुका साथै प्रविधिको प्रयोगलाई समेत प्राथमिकता दिइएको सशस्त्र प्रहरीले जनाएको छ। क्यामेराबाट खिचिएका दृश्यले सीमा क्षेत्रमा हुने शंकास्पद गतिविधिको अभिलेख राख्न र आवश्यक पर्दा अनुसन्धानका क्रममा प्रमाणका रूपमा प्रयोग गर्न सहयोग पुग्ने अपेक्षा गरिएको छ।
सशस्त्र प्रहरीको सक्रियतासँगै स्थानीय नागरिकबाट समेत तस्करी नियन्त्रण र सीमा सुरक्षामा सहयोग प्राप्त भइरहेको बताइएको छ। स्थानीयको सूचना र सुरक्षाकर्मीको प्रविधियुक्त निगरानीबीच समन्वय बढे सीमा क्षेत्रमा हुने अवैध गतिविधि नियन्त्रणमा थप प्रभावकारी परिणाम आउने सुरक्षा अधिकारीहरूको विश्वास छ।
