मोरङ । कोशी प्रदेश सरकारले आर्थिक वर्ष २०८३÷०८४का लागि ४० अर्ब ४४ करोडको बजेट सार्वजनिक गरेको छ।
सोमबार प्रदेशसभा बैठकमा कोशी प्रदेशका आर्थिक मामिला तथा योजना मन्त्री विदुरकुमार लिङ्थेपले ४० अर्ब ४४ करोड ५८ लाखको बजेट नीति तथा कार्यक्रम सार्वजनिक गरेका हुन्।
जसमा चालुतर्फ १३ अर्ब ९७ करोड ६३ लाख र पुँजीगततर्फ २० अर्ब ७५ करोड ९९ लाख बजेट विनियोजन गरिएको छ।
यस्तै वित्तीय व्यवस्थापनतर्फ १५ करोड र स्थानियतह वित्तीय हस्तान्तरणतर्फ ५ अर्ब ५६ करोड ३६ लाख बजेट विनियोजन गरिएको छ। यस्तै बजेटको स्रोततर्फ प्रदेशसरकारको आन्तरिक स्रोतबाट ५ अर्ब ५० करोड, राजस्व बाँडफाँटबाट १२ अर्ब ८७ करोड र वित्तीय समानीकरणबाट ९ अर्ब १२ करोड प्राप्त हुने अनुमान गरिएको लिङ्थेपले बताए।
यस्तै सशर्त अनुदानबाट ५ अर्ब ९५ करोड, समपुरकबाट ६४ करोड, विशेष अनुदानबाट ५५ करोड, रोयल्टीबाट ४१ करोड, सोझै नगद भुक्तानीबाट २० करोड र नगद मौज्दातबाट ५ अर्ब प्राप्त हुने अनुमान गरिएको लिंथेपले बताए। कोशी सरकारले ल्याएको बजेटमा पूर्वाधार, स्वास्थ्य, खानेपानीलाई विशेष प्राथमिकतामा राखिएको छ ।
