बिर्तामोड । किरात राई यायोक्खा झापाको नवौँ जिल्ला अधिवेशनबाट गणेशबहादुर राई पुनः अध्यक्षमा निर्वाचित हुनुभएको छ। अधिवेशनले राईको नेतृत्वमा १७ सदस्यीय जिल्ला कार्यसमिति सर्वसम्मत चयन गरेको हो।
२०८३ भदौ २० गतेदेखि सुरु भई २१ गते सम्पन्न अधिवेशनले गणेश बा राईलाई पुनः अध्यक्षमा चयन गरेको हो। यसैगरी, यसअघि कार्यवाहक सचिवको जिम्मेवारी सम्हाल्दै आउनुभएका गौरिमान राई पुनः सचिवमा निर्वाचित हुनुभएको छ। अन्य पद तथा सदस्यहरूमा भने फेरबदल गरिएको जनाइएको छ।
किरात राई यायोक्खा झापा जिल्ला कार्यसमितिको आयोजनामा तथा किरात राई यायोक्खाका केन्द्रीय अध्यक्ष जीवन हाताचोको प्रमुख आतिथ्यमा अधिवेशन सम्पन्न भएको हो। बिर्तामोडस्थित आदर्श ब्याङ्क्वेटमा आयोजित कार्यक्रममा झापाका विभिन्न पालिकाबाट प्रतिनिधिहरूको सहभागिता रहेको थियो।
किरात संस्कृति, परम्परा, इतिहास र पहिचानको संरक्षण तथा प्रवर्द्धनलाई प्राथमिकता दिँदै आयोजना गरिएको अधिवेशनमा बुद्धिजीवी, समाजसेवी, सरोकारवाला, शुभेच्छुक तथा समर्थकहरूको उल्लेख्य उपस्थिति रहेको थियो।
अधिवेशनलाई थप उत्साहपूर्ण बनाउन झापाका विभिन्न पालिकाबाट सहभागी टोलीहरूले किरात संस्कृति झल्काउने मौलिक नृत्य तथा सांस्कृतिक प्रस्तुति समेत दिएका थिए। सांस्कृतिक प्रस्तुतिले कार्यक्रमलाई थप आकर्षक बनाएको थियो।
कार्यक्रमको सञ्चालन गौरिमान राईले गर्नुभएको थियो भने अध्यक्षता गणेश बा राईले गर्नुभएको थियो।
अधिवेशनका अवसरमा समाजमा विभिन्न क्षेत्रमा योगदान पुर्याउने पत्रकार, प्रहरी, स्वास्थ्यकर्मी, समाजसेवीलगायत व्यक्तिहरूलाई सम्मान समेत गरिएको थियो।
नवनिर्वाचित समितिले किरात समुदायको संस्कृति, भाषा, परम्परा, इतिहास र पहिचानको संरक्षणसँगै सामाजिक एकता र समुदायको हकहितका क्षेत्रमा सक्रिय भूमिका निर्वाह गर्ने अपेक्षा गरिएको छ।
