अर्ग्यानिक उत्पादनमा जोड दिँदै बाहुनडाँगी साना किसान सहकारीको २२औं वार्षिक साधारण सभा सम्पन्न

७ आश्विन २०८२, मंगलवार,

बाहुनडाँगी । साना किसान कृषि सहकारी संस्था लि., बाहुनडाँगीको २२औं वार्षिक साधारण सभा मंगलबार एक विशेष कार्यक्रमकाबीच सम्पन्न भएको छ । मेचीनगर–४ स्थित बाहुनडाँगी सामुदायिक भवनको सभाहलमा आयोजित कार्यक्रममा अर्ग्यानिक तरकारी उत्पादनलाई प्रवद्र्धन गर्ने उद्देश्यले सदस्यहरूले उत्पादन गरेको अचार ‘मायाको चिनो’ का रूपमा वितरण गरिएको थियो । साना किसान कृषि सहकारी संस्था लि. बाहुनडाँगीकी अध्यक्ष टुका देवी दाहालको सभापतित्वमा भएको कार्यक्रममा संस्थाका पूर्व अध्यक्ष ठाकुरप्रसाद आचार्यको प्रमुख आतिथ्यता रहेको थियो । कार्यक्रममा कार्यपालिका सदस्य तिलजा देवान, पूर्व जिल्ला समन्वय सदस्य गंगादेवी कार्की, वडा सदस्यहरु सीता विक, सीता मोते, धनमाया कोइरालालगायतको आतिथ्यता रहेको थियो । संस्थाका उपाध्यक्ष पुण्डेप्रसाद निरौलाले स्वागत गरेको कार्यक्रमको सञ्चालन मुख्य प्रबन्धक पोषककुमार दर्जीले गरेका थिए । २०५३/०३/३१ मा डिभिजन सहकारी कार्यालय भद्रपुरमा दर्ता गरी २०५३/१०/०१ देखि साना किसान विकास आयोजनाको सम्पूर्ण कारोबार तथा व्यवस्थापनमा शुरु गरेको संस्थाको मेचीनगरका ५ वटै वडामा कार्यक्षेत्र रही २३९ समूह भित्र १३६४ घर परिवारलाई आबद्ध गरेको छ । संस्थाले सदस्यहरुको हितका लागि लघु कर्जा, पशुपालन कर्जा, ग्रामीण उद्यम कर्जा प्रदान गर्दे आएको छ । १६ करोड ६४ लाख ४७ हजार ३ सय ४४ कुल वासलात रहेको संस्थाले यस वर्ष ४० लाख ५९ हजार ७ सय २८ मुनाफा गरेको छ । संस्थाको १ करोड ९१ लाख २८ हजार २ सय रुपैयाँ शेयर पूँजी रहेको छ भने बचततर्फ ४ करोड ६८ लाख ४२ हजार रहेको छ । संस्थाले १२ करोड ७ लाख ८३ हजार २ सय ७३ ऋण लगानी गरेको छ । संस्थाको आर्थिक सहयोगमा पशुपालन गर्ने ४२ जना कृषक सदस्यलाई गाई भैंसी पालन सम्बन्धी तालिम तथा ७० जनालाई क्षमता विकास तालिम सञ्चालन गरिएको छ । सस्थाले सुत्केरी पोषण कार्यक्रम, पशु नश्ल सुधार कार्यक्रम, मृत्यु राहत तथा समवेदना कार्यक्रम समेत सञ्चालन गरिरहेको छ । कार्यक्रममा सामुदायिक विद्यालयमा एसर्ईई पास गर्ने विद्यार्थी समूह नं. १५१ की सदस्यकी छोरी सञ्जीवनी क्षेत्री लुइँटेलले ३.९६ जिपिए प्राप्त गरेकाले रु २१००।– तथा +२ मा समूह नं. ११९ की सदस्य सरिता खतिवडाकी छोरी सलिना खतिवडाले ३.०६ जिपिए प्राप्त गरेकाले रु ३,१००।– छात्रवृत्ति पुरस्कार वितरण गरेको छ ।

संस्थामा कारोबार गर्ने जेष्ठ सदस्यहरु समूह नं. ३० की सदस्य गंगादेवी कार्की र समूह नं. ११० का सदस्य सोमनाथ गौतमलाई ज्येष्ठ सदस्य सम्मान गरिएको छ भने उत्कृष्ट ऋणीतर्फ गीता थापा समूह नं. ९०, उत्कृष्ट बचतकर्तातर्फ जीवनकुमार दर्जी समूह नं. १२, उत्कृष्ट अन्तर समूहतर्फ अन्तर समुह ३, उत्कृष्ट समूहतर्फ समुह नं. ९६ लाई नगदसहित सम्मान गरिएको छ । संस्थाले आगामी वर्षदेखि ६५ वर्षमाथिका महिलालाई मातातीर्थ औँशी र ६५ वर्षमाथिका पुरुषलाई बुवाको मुख हेर्ने दिन सम्मान गरिने जनाएको छ । संस्थाले २९ औँ वार्षिक उत्सवमा मेचीनगर–७ स्थित समाज कल्याण सुधार युवा संघमा आश्रित बालबालिकाहरुलाई विद्यालय पोशाक तथा खाद्यान्न उपलब्ध गराइएको थियो । साना किसान कृषि सहकारी संस्था लि., बाहुनडाँगी अर्ग्यानिक कृषि, वित्तीय सशक्तिकरण र सामाजिक जिम्मेवारीका क्षेत्रमा उल्लेखनीय भूमिका निभाउँदै आएको छ । यस सहकारीले सामुदायिक विकासमा पुर्‍याएको योगदान अन्य सहकारी संस्थाहरूका लागि पनि अनुकरणीय बन्न पुगेको छ । राष्ट्रिय सहकारी नियमन प्राधिकरणको साधारण सभा सम्बन्धी निर्देशन अनुसार संस्थाको साधारण सभामा गैर सदस्यलाई अतिथिमा आमन्त्रण नगरिएको संस्थाका मुख्य प्रबन्धक पोषककुमार दर्जीले बताए ।